Tuesday, November 10, 2015

Ngano mag Pari man ka?

"Angayan man pud diay ko mag Pari"
Daghan ang nangutana sa ako-a "Ngano mag pari man ka dong, sayang ang imung kagwapo, di ka kaliwat?" Mao kini kasagaran nakong madungog sa mga taong nakaila nako sa amoang parokya labi na kadtong mga tigulang na Katekista. Hinuon dili pud nako mabasol ang Ginoo ngano iya kong gi buhat sa kalibutan na arang-arang pud og panagway. Mao ni akong gusto klarohon kung unsa jud ang tinood na hinungdan, ug aron inyo pud na masayran ug masabtan ang kamatuoran.

Nakahinumdom pako atung mga panahon na una ko nag alagag isip sakristan sa among kapilya sa Sarphil kadtong 7 anyos pa akong pangidaron. Aktibo kaayo ko sa among Kapilya labon na ug naay mga kalihukan bahin sa mga kabataan ug kabatan-onan. Sukad niadto, napalambo nako akong relasyon sa simbahan, ug sa kumunidad na akong gidak-an. Pag serbisyo nako isip sakristan, isa pud sa mga di nako makalimtan na nahitabo sa akong kinabuhi. Tungod kay naa lang mi sa kapilya, ka isa lang sa isa ka bulan lang mi mag saulog na pari ang mangulo. Dako kaayo akong pagtan-aw sa kinabuhing relihiyoso niadtong panahona. Ako-a pud na gi balanse ang kinabuhing mag-inusara inig abot sa panahon, taas paman pud ang panahon para mamalandong anang mga butanga. Ni abot pud ang panahon nga napul-an napud ko, ug naundang ko sa serbisyo tung nag unang tuig ko sa Highschool.

"Kasagaran ni sulod og seminaryo kay mga gwapo." matud pa sa akong mga classmate na bae kadtong highschool pa mi. Pero dili na mao akong dakong rason.  Niagi daw sila sa parokya ug nakakita daw sila ug seminarista na gikan sa Diocese; buotan daw, kugihan, ug labaw sa tanan maalampuon. Hinuon dili man pud siguro tanan, siguro maihap lang pud, ug dili pud siguro malikayan na matintal sila, total sila mga lalaking buhat man pud. Daghan sa amoang classroom ang naay potensyal na mahimong pari, labon na tung among classmate na mga nailhang tig simbahan sa parokya (Hustisya nalang sa mga taga baryo kay sa Kapilya ra musimba). Maingon pud nako sa akong kaugalingon na pwede pud ko, pero kadto tanan naa ra sa akong kaugalingon pagdayeg.

Niabot ang panahon na nisulod ko ug seminaryo. Wala sila nagdahom sa mga panghitabo, total ako lang and usa sa amu-ang Batch ang nakahukom na mosulod sa parionong kinabuhi. Ang kinabuhi sa seminaryo kay dili sayon, kay sa imung dalan nga agi-an, daghan ug tunok ug mga kalisod ang imong masinati. Matod pa sa usa ka kanta sa simbahan inig abot sa kwaresma "Dili sayon ang pagsunod kang Kristo, daghan tunok ang dalan na agi-an mo, bug-at ang krus na pas-anon mo, ug kamatayon naa naghulat kanimo" ug mao ni ang akong gina pamalandungan.

Usahay dili pud nako masabtan ang kinabuhi sa tao. Ngano kinahanglan man nato maglisod, ug masakitan kung mamatay raman ta sa katapusan? kini nga pangutana naghatag sa ako ug ideya ngano kita nahimugso niining kalibutana, Tingali naa juy dakong rason ngano naa ta diri sa kalibutan karon mga takna-a.

Kitang tanan gihatagan sa Ginoo ug tagsa-tagsang tawag pinaagi sa iyang kaalam, tungod kay siya man ang labaw na makagagahom sa tanan. Iyang tawag pinaagi sa kaminyuon, kabulahanan, ug ang pina ka espesyal sa tanan ang tawag sa pagsulod sa relihiyosong kinabuhi; mapa madre man o pagka pari.

"Ngano mag pari man jud ka?" Nibalik napud ang pangutana. Sayon lang akong tubag "Mao na ang misteryo sa atong Ginoo igsoon. kay kining tanan iyaha ning pagbuot," ug mao ni ang akong dakong hinungdan ngano naa ko karun sa seminaryo. Kung atong tan-subayon ang Karaang Tipan sa Bibliya, bisan ang mga ordenaryong tawo wala sila na sayod na sila diay ang pinili sa Ginoo na mahimong propeta para itudlo ang mga tambag sa Ginoo ngadto sa iyang mga katawhan sa yuta. Una paman, wala sila nahibalo na sila diay ang pinili sa Diyos na mupahayag sa Maayong Balita sa iyang katawhan. Nakabati pa silag pag duha-duha kay tungod dili sila takus ug angay na mubuhat sa iyang mga sugo, apan ila kining bug-os nga gidawat.

Ang tawag sa Ginoo kay walay kongkretong sukdanan; dili na importante kung asa ka gikan, kung unsa ang imung istados sa kinabuhi, ug unsa ang imong pagkatawo (Dili pud importante kung gwapo ka og dili, ang importante tinood ka nga nag alagad sa Ginoo). Mao ni ang dakong misteryo sa atong pagtu-o isip mga Kristyanong binuhat. Miingon si Hesus sa iyang mga pinili "Dali sunda ko ninyo, ug buhaton ko kamong isda sa akong katawhan". (Mk.1;17) Ilang gibiyaan ang ilang mga gipangbuhat, ug ilang gisundan si Hesus para magsangyaw. Ako, ikaw, kitang tanan gi tawag sa Ginoo, ug naa ra na kanato kung unsaon nato pagtubag sa iyang pagsampit sa atong mga tagsa-tagsang kasing-kasing. 

1 comment:

  1. Kaliwat ra man gihapon ka dong...dili nga lang kaitsura mo kundi kaitsura sa Ginoo...
    Ur proud kuya, :)

    ReplyDelete